Қарақалпақстан Республикасында II Халықаралық бақсышылық фестивалы алдынан  бақсы-жыраў, сазенделериң арасында өткерилетуғын Республикалық таңлаўының  Қарақалпақстан  Республикасы  басқышы ѳткерилди.

Бүгинги ѳткерилген таңлаў қатнасыўшыларының шығыўларын баҳалаў ушын тѳрешилер қурамы баслығы Өзбекстан халық бақсысы Ғайратдин Өтемуратов сѳзге шығып баҳалаў процесинде бақсышылық, жыраўшылық, сазенделик ҳәм қыссаханлық пенен дәстан атқарыўшылық ѳнери үлиглеринниң тийкарғы миллий қәсийетлери, қоркемлик ҳәм эстетикалық пурмаънологи, атқарыўшылардың атқарыў шеберлиги, кийиниўи ҳәм сахна мәденияты, атқаратуғын қосық, нама, терме-толғаўлардың кѳркемлик әҳмийети ҳәм ѳзине сайлығы, халық атқарыўшылығы усылларын ийелегенлик дәрежеси, атқарыў усыллары ҳәм жоллары, безектиң кѳркемлик дәрежеси (кийимлер,реквезит) ҳәм оның миллий дәстүрлерге сайлығы, дәстүрий музыка әсбапларынан пайдаланыў тийкарғы нормалары есапланатуғынлығын айтып ѳтти ҳәм тѳрешилер қурамы Республикалық таңлаў қатнасыўшыларының шығыўлары тѳмендеги жѳнелислер бойынша баҳалады.

―Дәстан атқарыўшылығы; жыраўшылық жѳнелиси бойынша
Саламат Аяпов ҳәм Жанибек Пиязовлар,
Бақсышылық жѳнелиси бойынша қыз бақсылар арасында
Гульбахар Ақымбетова, Лола Мухаметдинова ҳәм Динара Нуратдиновалар.
Бақсышылық жѳнелиси бойынша ер-баллар арасында
Ерисбай Асқаров, Қуўаныш Сейтимбетов ҳәм Камал Алымбаевлар.
―Саз атқарыўшылығы;
Оралбай Отамбетов ҳәм Артық Ережеповлар ҳәр еки жылдан бир мәрте ѳткерилетуғын Халықаралық бақсышылық кѳркем ѳнери фестивалына Қарақалпақстан Республикасы атынан қатнасыў ҳуқықын бериўши жолламаға ийе болды.

Таңлаў жуўмағында тѳрешилер қурамы ағзалары Өзбекстан халық бақсысы Теңел Қаллиев, Қарақалпақстан халық жыраўы Бақберген Сырымбетов, Қарақалпақстан халық бақсысы Гулнара Алламбергенова ҳәм Мәденият мәкемелери хызметин шѳлкемлестириў бѳлими бас қәнигеси, хаткер Парахат Мамутовлар сѳзге шығып таңлаў қатнасыўшыларын қутлықлап дѳретиўшилик жумысларына табыслар тиледи.