ЎЗБЕКИСТОН БИРИНЧИ ПРЕЗИДЕНТИ ТАВАЛЛУДИГА БАҒИШЛАНДИ
Жорий йилнинг 31 январь куни Нукус гарнизони Маънавият ва маърифат марказида Шимоли-ғарбий ҳарбий округи, Республика маънавият ва маърифат маркази Қорақалпоғистон Республикаси бўлими, Бердақ номидаги Қорақалпоғистон давлат университети ҳамда Мудофаа вазирлиги ҳузуридаги Жамоатчилик кенгаши Қорақалпоғистон Республикаси минтақавий бўлинмаси ҳамкорлигида Ўзбекистон Республикаси биринчи Президенти Ислом Абдуғаниевич Каримов таваллудига бағишланган маънавий-маърифий тадбир ташкил этилди.
Тадбирни ҳарбий округ қўшинлари қўмондонининг тарбиявий ва мафкуравий ишлар бўйича ўринбосари подполковник Нуриддин Кадиров очиб берди. Сўнг таклиф этилган меҳмонлар томонидан Ислом Каримовнинг давлатимиз раҳбари сифатида олиб борган сиёсати, юрт тинчлиги ва равнақи йўлида олиб борган ислоҳотлари ҳақида маърузалар тингланди.
Тадбир давомида ҳарбий хизматчилар эътиборига «Ўзбеккино” Миллий агентлиги томонидан ишланган «Эъзоз” номли видеоролик намойиш этилди.
Шундан сўнг, Қорақалпоғистон Республикаси Маданият вазирлигининг бир гуруҳ санъаткорлари томонидан концерт дастури бўлиб ўтди. Концертга Ӯзбекистон давлат филармонияси Қорақалпоғистон Республикаси бӯлинмасидан «Ниҳол» мукофати совриндори Гулназ Утепова ва эстрада хонандалари Нурсулыӯ Төрениязова, Узақберген Дошбаев, Елиӯбай Қайпов, Қадир Сайтов ва Султан Қосекеевлар қатнашди.
Шунингдек, тадбир доирасида Президент Шавкат Мирзиеёвнинг 2018 йил 4 августдаги «Ўзбекистон Республикаси Қуролли Кучлари ҳарбий хизматчиларининг маънавий-маърифий савиясини ошириш тизимини тубдан такомиллаштириш тўғрисида»ги ва Вазирлар Маҳкамасининг «Ўзбекистон Республикаси Қуролли Кучларининг «Маънавий-маърифий ишлар аълочиси» кўкрак нишонини таъсис этиш тўғрисида»ги қарорлари билан таъсис этилган мазкур кўкрак нишони Қорақалпоғистон Республикасининг бир қатор фаол давлат ва жамоат ташкилотлари вакилларига тантанали топширилди. Ўзбекистон Қуролли Кучлари ташкил топганининг 28 йиллиги ҳамда Ватан ҳимоячилари куни байрамига тайёргарлик кўриш ва ўтказиш бўйича Президент фармойишига мувофиқ юртимизда ўтказилган ватанпарварлик ойлигида жонбозлик кўрсатган бир гуруҳ ҳарбий хизматчилар Мудофаа вазири ҳамда ҳарбий округ қўшинлари қўмондони томонидан муносиб рағбатлантирилди. Тадбирда мукофотлар ўз эгаларига топширилди.
