Мўйноқда 1 кунда 7 та янги объект фойдаланишга топширилди
Жорий йилнинг 23 октябрь куни Мўйноқ туманида бир қатор янги объектлар фойдаланишга топширилди.
«Future Muynak», «Вookcafe». Ўзбекистон Республикаси Бош прокуратураси ташаббуси билан янгидан қурилган «Future Muynak» ахборот технологиялар маркази ва «Вookcafe»нинг фойдаланишга топширилиши мўйноқлик ёшларнинг орзуларини рўёбга чиқишида катта қадам бўлди. Чунки бу муассасаларда ёшларнинг компьютер технологияларини ўрганиши ва замонавий адабиётларни ўқиши учун барча қулайликлар яратилган. Марказ ўқитувчилари Тошкент ахборот технологиялари университетининг Нукус филиали томонидан ташкиллаштирилган махсус тренингларда ўқитилди. Энг сўнгги русумдаги замонавий компьютерлар билан таъминланган «Future Muynak» ахборот технологиялари марказида ёшлар бугунги кун талабига жавоб берадиган 2D-графика, 3D-моделлаштириш, веб-дизайнерлик, дастурлаш каби мутахассисликлар бўйича билимларни чуқур эгаллаш имкониятига эга бўлса, «Вook cafe» кутубхонасида бадиий ва бошқа китобларни ўқиб билимини ошириши, маънан ҳордиқ чиқариши мумкин.
Электр тармоқлари мажмуаси. Замонавий типда қурилиб, уч қаватли офис, хостел, интернет кафе ва овқатланиш марказини ўз ичига олган мазкур мажмуа аввал мисли кўрилмаган мажмуа бўлди, десак муболаға бўлмайди. Туман чиройига чирой бағишлаб турган бу иморат туман электр тармоғи ходимлари ва меҳмонлари учун катта совға бўлди.
“Сурхон қуёши” болалар боғчаси. Бугун мактабгача таълим соҳасини таълим-тарбиянинг энг асосий бўғинига айлантириш, соҳани тубдан ривожлантириш, моддий-техник базасини мустаҳкамлаш борасида амалга оширилаётган ислоҳотлар халқимизнинг болалар боғчасига бўлган қарашини бутунлай ўзгартириб юборди. Сурхондарё вилоятидаги “Сурхон саноат курилиш” компанияси томонидан совға сифатида қурилган 70 ўринли “Сурхон қуёши” болалар боғчаси туман халқи учун ана шундай масканлардан бирига айланиши шубҳасиз.
Болалар мусиқа ва санъат мактаби ҳамда “Орол денгизи тарихи” музейи. Туманда қад кўтарган Болалар мусиқа ва санъат мактаби ҳамда “Орол денгизи тарихи” музейи қорақалпоқ маданиятининг янада ривожланишида янги босқични бошлаб берадиган даргоҳлар сифатида туман халқининг энг севимли масканларига айланиши сўзсиз. Янгидан қурилган мусиқа мактаби 150 ўқувчига мўлжалланган. Мактаб 2 қаватли ўқув биноси, 210 ўринга мўлжалланган концерт зали ва ёзги эстрада бўлимларидан иборат. Мусиқа ва санъат мактабида ўқувчилар 8 йўналиш бўйича таҳсил олади. Эски кемалар йиғилган жойда янгидан қурилган музей биносида Орал денгизининг ўтмиши, турфа хил қушлар, балиқлар ҳақида маълумотлар, кемаларнинг турли ускуналари, тарихий фотосуратлар ва рассомларнинг ижод намуналари ўрин олган.
“Мотамсаро Она” ёдгорлик мажмуаси Иккинчи жаҳон уруши қатнашчилари ёдгорлиги сифатида қурилиб, мажмуадаги 6 китобда урушда қатнашиб, қайтиб келмаган туманнинг 1320 фарзандининг номлари битилган. Бу мажмуа ёшларимизнинг ўз аждодлари тарихини билишидаги, уларни она Ватанга муҳаббат ва садоқат руҳида тарбиялашдаги, бугунги тинчлик ва осойишталикнинг қадрига етишни ўргатишдаги ўрни жуда муҳим ҳисобланади.
Шунингдек, Туман халқ таълими бўлими янги иморати икки қаватли бўлиб, бу ерда таълим соҳаси ходимлари учун барча қулайликлар яратилган. Албатта, бу объектлар туман кўркига кўрк қўшиш баробарида маҳаллий аҳолининг турмушини яхшилаш, уларни иш билан таъминлаш, ёшларнинг билим олиши, ҳунар ўрганиши, маданият ва санъатга қизиқишининг ортишида, туман аҳолиси ва республикамиз меҳмонлари учун қулайликлар яратишда муҳим аҳамиятга эга.
