Қарақалпақстан Республикасыныӊ «Мәмлекетлик тил ҳаққында»ғы нызамы қабыл етилгенлигине 30 жыл
Усы жылдыӊ 30-ноябрь күни «КИНО КОНЦЕРТ» залында залында Қарақалпақстан Республикасыныӊ «Мәмлекетлик тил ҳаққында»ғы нызамы қабыл етилгенлигине 30 жыл толыў мүнәсибети менен жыйналыс болып өтти.
Жыйналыста Қарақалпақстан Республикасы Жўқорғи Кеӊеси баслығыныӊ орынбасары А.Хамраев шығып сөйлеп, жыйналғанларды қарақалпақ тилине мәмлекетлик тил бийлиги берилгениниң 30 жыллығы байрамы менен қызғын қутлықлады.
Атап өтилгениндей, тил халықтың тарийхын, мәдений мийрасын, үрп-әдет және дәстүрлерин өзинде жәмлеген бийбаҳа байлық болып есапланады. Ана тилин ҳүрмет етиў, таза сөйлеў инсан баласының ўазыйпасы, парызы болып табылады. Миллеттиң тийкарғы белгиси өзиниң айрықша тилиниң болыўы есапланады. Егер миллет өз тилинен айрылса, миллет те болмайды. Ана тили мәмлекеттиң жәмийетлик-сиясий, руўхый жақтан раўажланыўында әҳмийетли орын ийелейтуғын қәдириятлардан бири болып табылады.
Усы жылдың 21-октябрь күни Президентимиз Ш.Мирзиёев Өзбекстан Республикасының «Мәмлекетлик тил ҳаққында»ғы Нызамы қабыл етилгениниң 30 жыллығына бағышланған салтанатлы мәжилисте Өзбекстан Республикасы Министрлер Кабинети жанынан Мәмлекетлик тилди раўажландырыў департаментин ашыў ҳаққында усыныс билдиргеннен соң арадан он бес күн өтип депармент жумыс баслады. Сондай-ақ, 2020-2030-жылларға Мәмлекетлик тилди раўажландырыў концепциясын ислеп шығыў мәселеси көтерилди. Ҳақыйқатында да, бүгинги глобалласыў дәўиринде миллий өзликти аңлаў, миллеттиң айнасы болған ана тилди таза ҳалында сақлаў, қәстерлеп абайлаў әҳмийетли мәселе болып бармақта. Сол ушын республикамызда қарақалпақ тилин қолланыўды жетилистириў, қарақалпақ тилиниң сөзлик байлығын раўажландырыў, басқа тиллерден кирип келген сөзлерди тәртиплестириў, олардың өзимиздиң тилимизде бар сыңарларын қолланыў мақсетинде жумысларды еле де жетилистириў керек .
Қатнасыўшыларға көркем өнер шеберлери ҳәм жас атқарыўшылардың концерт бағдарламасы қойып берилди. Концертке Өзбекстан мәмлекетлик филармониясы Қарақалпақстан Ресупбликасы бөлиминен «Халық сазлары» ансамбли ҳәм Қарақалпақстанға хызмет көрсеткен артист Мухаббат Нуржанова, Гулнигар Сапаева, эстарда қосықшылары Бахтияр Қазақбаев, Нурсулыӯ Төрениязовалар ҳәм ойыншы қызларымыз қатнасты.
